رنگا رنگ

علامہ اقبال کی قلندر مزاجی

ایک دن علامہ اقبالؒ حسب معمول بنیان پہنے اور تہبند باندھے مکان کے برآمدے میں بیٹھے تھے۔ حقہ سامنے تھا اور احباب سے تبادلہ خیال جاری تھا۔ ممتاز حسن بھی اس صحبت میں شریک تھے۔ اتنے میں دو قد آور فوجی جوان جو وضع قطع سے شمالی پنجاب کے کسی ضلع کے رہنے والے معلوم ہوتے تھے، وہاں آئے اور بڑی خاموشی کے ساتھ خالی کرسیوں پر بیٹھ گئے۔ تھوڑی دیر بعد ان میں سے ایک نے ممتاز حسن سے پوچھا: ترجمان حقیقت، حضرت علامہ ڈاکٹر شیخ محمد اقبال ایم۔ اے، پی ایچ۔ ڈی، بیرسٹر ایٹ لا، ممبر پنجاب قانون ساز کونسل کہاں ہیں؟ ممتاز صاحب کو اس سوال پر بے اختیار ہنسی آ گئی۔ ایک صاحب نے ان کے ہنسنے کا سبب پوچھا تو انہوں نے بتایا: یہ صاحب ترجمان حقیقت، حضرت علامہ ڈاکٹر سر شیخ محمد اقبال…. کی تلاش میں ہیں، وہ ان کو ابھی تک نہیں مل سکے۔ اس پر ان صاحب نے، جو اقبال کے پرانے دوست، اسلامیہ کالج پشاور کے پروفیسر محمد شفیع تھے، ان نوجوانوں کی طرف دیکھا اور علامہ اقبال کی طرف اشارہ کر کے کہا: یہ کون بیٹھا ہے اس پر ایک قہقہہ پڑا۔ ان قہقہہ لگانے والوں میں خود علامہ اقبال بھی شامل تھے۔ اس قہقہے کے انداز سے وہ فوجی سمجھ گئے کہ ترجمان حقیقت، علامہ اقبال…. جن کی تلاش میں وہ آئے تھے اس قدر سادگی اور قلندرانہ انداز میں ان کے سامنے بیٹھے ہیں۔